Yurtimizda yoshlar ma’naviyatini yuksaltirish, ularni bilim va tashabbuslarini ro‘yobga chiqarish maqsadida turli tanlovlar va intellektual o‘yinlar o‘tkazilmoqda.

Xabaringiz bor, Andijon davlat universiteti Yoshlar Ittifoqi boshlang‘ich tashkiloti tashabbusi bilan universitetimizda ta’lim oluvchi 1-kurs talabalari o‘rtasida «Rektor kubogi» uchun zakovat intellektual turniri tashkil etilgan edi.

Turnirda har bir fakultetning 1-kurs talabalaridan iborat saralangan jamoalar ishtirok etdi. Turnirning yakuniy natijalariga ko‘ra, eng yuqori ball to’plagan chet tillar fakultetining “Pinnacle” jamoasi rektor kubogi sohibiga aylangan bo‘lsa, ijtimoiy iqtisodiyot fakultetining “Menejerlar” jamoasi 2-o‘rinni, jismoniy madaniyat fakultetining  “Zahiriddin vorislari” jamoasi esa 3-o‘rinni egalladilar.  

Bugun, 29-aprel kuni Andijon davlat universiteti pedagogika fakultetining faollar zalida intellektual o‘yin g’oliblari va sovrindorlarini taqdirlash marosimi bo’lib o‘tdi. Karantin qoidalariga to‘la amal qilgan holda o‘tkazilgan taqdirlash marosimida diplom va “Rektor kubogi”ni Yoshlar ittifoqi boshlang‘ich tashkiloti yetakchisi Omadbek Olimjonov  g’oliblarga topshirdi.