Joriy yilning 23-aprel kuni, Paxtaobod tumanidagi 4-umumta’lim maktabida “Nemis tili” kuni munosabati bilan filologiya fanlari doktori, professor Muxtorxon Umarxo‘djayev ishtirokida viloyatimizdagi nemis tili fani o‘qituvchilari uchun fan olimpiadasi hamda master-klass tashkil etildi.

Mazkur tadbir karantin tartib-qoidalariga amal qilgan holda tashkil etilib, tadbirda Andijon davlat universiteti nemis tili va adabiyoti kafedrasining professor o‘qituvchilari hamda filologiya fanlari doktori, professor M.E.Umarxo‘djaevning shogirdlari ham ishtirok etdilar.

O‘tkazilgan tadbirda shahar, tumanlardan tashrif buyurgan 70 nafardan ziyod nemis tili fani o‘qituvchilari professordan fanga oid kerakli tavsiyalarni o‘rganishib, o‘zlarining bilimlarini yanada boyitishga erishdilar.

Shuningdek, o‘tkazilgan fan olimpiadasi natijalariga ko‘ra 6 nafar nemis tili fani o‘qituvchilari  g‘olib deb topilib, ularga viloyat xalq ta’limi boshqarmasining diplomi, qimmatbaho sovg‘alar hamda professor Muxtorxon Umarxo‘djaev tomonidan yozilgan nemis tiliga oid noyob kitoblar jamlanmalari bilan taqdirlandilar.